Veseli deklarohet i pafajshëm

LAJME

Ish-kreu i Partisë Demokratike të Kosovës dhe ish-kryeparlamentari, Kadri Veseli, është paraqitur para Gjyqtarit të Procedurës Paraprake në Hagë.


Ai është deklaruar i pafajshëm, duke thënë se i ka i dëgjuar dhe i ka lexuar të gjitha pikat e aktakuzës, shkruan Reporteri.net.
“I nderuari gjykatës, i kam dëgjuar dhe i kam lexuar të gjitha pikat e aktakuzës. Më lejoni të deklarohem me plot bindje që jam i pafajshëm për të gjitha pikat e aktakuzës.”, deklaroi Veseli.

Kjo është paraqitja e tij e parë në sallën e gjyqit të Dhomave të Specializuara.

Ai u arrestua nga Zyra e Prokurorit të Specializuar më 5 nëntor dhe u transferua në objektin e paraburgimit të Dhomave të Specializuara të Kosovës në Hagë në të njëjtën ditë.

Aktakuza e ngarkon Kadri Veselin me akuza për krime lufte dhe krime kundër njerëzimit sipas të drejtës ndërkombëtare, për forma të ndryshme të përgjegjësisë penale.